Mit viel Freude und Engagement am Jugitag!

Seel. Jugendturntage in Täuffelen, 5./6. Juni 2004
(Von Regula Hauert, 23.6.2004)

Am Samschtig-Mittag si mir ds erscht mau a däm Wucheänd richtig Täuffelen ungerwägs für ä Liechtathletik Einzu Wettkampf. äs si 29 Jugendliche u 5 Leiter u Betreuer, u no ä Gruppe Eutere, wo ihrer Schützlinge chöme cho afüre. Ds Wätter isch liecht bewöukt u mir hoffe, dass äs emu nid chunt cho reägne.

Nach däm das i üs agmäudet ha, hei mir am 13.30 Uhr üse Wettkampf i de entsprächende Gruppe gstartet. D'Reihefolg isch egal, mit meh oder weniger Glück mues me warte oder de nid.
Mir, das heisst em Danu u mini Gruppe (die Jüngschte) mit 6 u 12 Ching si zum Pendulouf go starte. Nachem guete Yturne mit em Dänu u mit em Hopp rüefe vo aune, si einigi richtig schnäu gsi. ä chlei verschnufe, u de isch äs witer gange zum Standwitsprung. Nach em Probesprung hets zeut. Drei Versüech het jedes gha u dr Bescht het zeut. Bi mire Gruppe het das zwüsche 1,25 Meter bis 1.77 Meter Sprunglängine us em Stand gä. ä chlei dr Sand abschüttle u de si mer witer zum Bäueliwärfe, ja u da hei mer müese ä haub Stund warte. ä chline Rägeguss het üs Zyt ä chlei verchürzt ä so mit alege u abzieh. ändlech si mer zu däm Wärfe cho. Ou hie hei d'Ching ä Probeschuss gha u de drei Wurfchanche u dr längscht het zeut. Am Han Han sini Wurftechnik het viu ds Schmunzle gä u am Räfi siner wite Bäll as "Ahhhh". So si mer zur letschte Disziplin, em Crosslauf. Nach dr Amäudig hets d'Nummero gä, alege, binge u de zum Start. Si hei grad aui 18i zäme chönne starte. "Auf eure Plätze, fertig, los" u si si ab wie d'Ragete uf ä Mond. Dr Crosslauf isch sehr aspruchsvoll, zersch geit är ä drittu abe, när immer liecht ufe u am Schluss no chlei steiler. U das hei d'Ching wärend em springe gmerkt, aussert dr Raphael dä isch sprunge viu viu schnäuer aus aui angere. Wo är isch im Ziel gsi, isch lang niemer me cho. Mit grosser Hiuf vo üs u de Eutere heis aber ou die angere Ching aui gschaft ohni ds Laufe is Ziel ds cho. Nach dere grosse Asträngig hets ä chlei Zyt brucht bis aui ihre Puls witer hei im normale Bereich gha u de si mer zrügg is Feschtzäut öppis go ässe. U zum Dessert het dr Süessigkeitestand nid dörfe ds churz cho. Guet gstercht u ds friede si mer nah dis nah wider uf Ins zrügg cho. D'Rangverkündigung isch ersch am Sunntignami gsi.

Am Sunntig Morge am viertu vor sibni hei mir üs aui u no viu meh wider troffe bir alte Turnhalle. Nach em Apell si mir Richtig Täuffelen gfahre mit zwe Busse u de Privatautos.
Nach Täschedepot im Feschtzäut u dr Riegemäudig si mir zum Träffpunkt vor em Grätzäut gloffe. Da ha i die erschte Gruppeytelige verlässe u de am 8.20 Uhr hei mir üse erscht Wettkampfteil gstartet mit Gerätekombi OS (GK OS), Gymnastik Bühne (GYB), Kugelstosse (KU) u Zielwurf (ZW). Mit viu Fröid u Engagement hei mir üse Wettkampf super turnet u hei üs aui wider bim Träff besammlet. Die 2. Yteilig, u am 9.20 Uhr het scho dr zwöit Wettkampf agfange mit Gerätekombi US (GK US), Medizinballstosse (MB) u 4 Athlon (4A). Ou bi dene Wettkämpf hei die Jugendliche u Leiter/Betreuer au iri Chräft igsetz u ä tolli Leischtig zeigt. Nach dr dritte Yteilig si mer am 10.30 Uhr a üse dritt u somit letscht Wettkampfteil mit Gymnastik Kleinfeld (GYK), Pendelstafette (PS) u Sektorensprung (SKS) gstartet. Mit no einisch zum Teil grossem Elan isch ou dä Wettampf erturnt worde.
Mit viu Emotionen u guete Notene (die wo me scho weiss) si mir zrügg is Feschtzäut zum z'Mittagässe. Ds Menu isch gsi Teigware mit Bolognaisesauce, äs Petfläschli ds Drinke u zum Dessert ä Glace. Dr Organisator het das sehr guet organisiert gha, ds Menu hets uf emene Tableau serviert gä u so si d'Ching sehr säubständig gsi u äs het keini Zwüschefäu gä. U äs grosses Lob em Chuchichef, äs isch sehr fein gsi.
Jetz hei mir aui ä längi Pause gha, aui hei sech ds beschäftige gwüsst. Sigs bim Traktor-Pulling, am Süessigkeitestand, am Spile, ir Kaffestube u so wyter. Am viertu vor zwöi hei mir Leiter üser Gruppe gmacht für am Namitag bir Seelandstafette. När isch die ganzi Schar zum Schutplatz abe gloffe um ä gmeinsame Träff ds bestimme u am Namitagsprogramm teildsnäh. I ha no Leitersitzig gha, um d'Infos für am Rahmeprogramm ds übercho.
Bi de Vorläuf vo dr Seelandstafette si aui üser 9 Mannschafte usegheit u so hei mir bi de Finalläuf nur aus Zueschauer chönne würke.
Nah dis nah isch d'Spannig ä chlei grösser worde, uf welem Rang mir üs befinde. Am füfi isch d'Rangverkündigung gsi u do hei mir vernoh das mir uf em sehr guete 4. Platz si ir erschte Stärkeklass vo 12 Jugendriegene, aber nur 0.06 hinger em 3. Platzierte. Das het üs aui ä chlei möge aber mir chöme nöscht Jahr wider.

Resulat vom Vereinswettkampf:
1. WT: GK S 9.30 (14), GYB 8.49 (8), KU 8.44 (8), ZW 8.50 (56)
2. WT: GK US 8.79 (17), MB 8.21 (8), 4A 8.38 (68)
3. WT: GYK 8.71 (21), PS 7.87 (28), SKS 8.57 (40)
Total Punkte: 25.44

Merci viu mau a aune Leiter, Betreuer u a de Ching für öie gross Ysatz, Fröid u Engagement! äs fägt mit Euch ä so emene Wettkampf teildsnäh u ä so äs schöns Wucheänd dörfe ds erläbe. äs grosses Merci geit ou a aui Eutere wo üs so tatchräftig ungerstütze u üs ou begleite.

Regula Hauert


Resultat vom Einzelwettkampf:
Kat. C Knaben
1. Weber Raphael Goldmedaille
Kat. B Knaben
35. Mäder Lukas
Kat. A Knaben
56. Zihan Guo Han Han
J+S 6 Knaben
38. Mäder Raphael
40. Feissli Fabian
J+S 5 Knaben
27. Schönenberg Lucien
J+S 3 Knaben
23. Kummer Dominic
26. Guillod Richard
J+S 2 Knaben
29. Guillod Christopher
30. Balmer Philipp
Kat. C Mädchen
25. Jenni Micaela
28. Gatschet Bianca
59. Aeschlimann Linda
61. Seybold Melanie
73. Lackner CÚline
Kat. C Mädchen
4. Gatschet Corinne Goldkreuz
11. Hämmerli Alicia Goldkreuz
20. Hämmerli Carole Goldkreuz
21. Pels Anouk Goldkreuz
Kat. B Mädchen
41. Lackner Laura
50. Büchler Leila
58. Freitag Pia
Kat. A Mädchen
8. Siegrist Luana Goldkreuz
27. Studer Lara
32. Zbinden Linda
Kat. J+S 6 Mädchen
25. Balmer Delia Goldkreuz
29. Balmer Lara
Kat. J+S 5 Mädchen
10. Vogel Romina Goldkreuz
64. Gugger Gwendoline

Kopierrecht © 1997-2004 bei Turnverein Ins, Schweiz
Alle Rechte vorbehalten.