Ein wunderschönes Wochenende für unseren Nachwuchs!!


Seel. Jugendturntage, 14./15.6.2003
(Von Regula Hauert, 19.07.2003)

Samstag 14. Juni 2003
D Besammlig isch am viertu ab zwöufi uf em Parkplatz vor Sporthaue ds Ins bi schönschtem Wätter u sehr höche Themperature. Mit 25 Liechtathlete Einzel u 9 Leiter u Betreuer fahre mir Richtig Dotzige. Ä chlei nervös u gspannt chöme mir ufs Feschtgländ, schön hei sie das Zäutdorf härgrichtet. Sogar ä Pool hets mits drinne! Aber dä mues no warte, zersch öppis leischte, vorem Vergnüege.
Start vo üs isch ir Abteilig 5, Beginn 14.00 Uhr. Jede Leiter mit de zuetteute Jugendliche wäut säuber d'Reihefoug vo de Diszipline - u de geit's scho los. Ir grosse Hitz versueche d'Turnerinne u d'Turner ihres Beschte ds gä. Langsam chöme grossi Wouche am Himmu uf u mir ghöres tonnere. Schnäu no zum Crosslauf bevor's afat rägne. Fasch aune längts zrügg is Feschtzäut, no drüe müesse dr 1000 Meter sekle bi dä chüele Nass. Tropf nass chöme si de is Zäut zrüg - u hei üs plötzlich ganz fescht gärn, gäu Dominic!?!
Glücklech u chlei müed chere mir uf Ins zrügg. D'Resultat gits ersch am Sunntig.


Sonntag 15. Juni 2003
Hüt heists früeh uf: am haubi sibni träffe mir üs bir Sporthaue. De mache mir Appäu u scho chunt d Abfahrt nach Dotzige für ä Vereinswettkampf. Ds Ins hets no grägnet gha aber ds Dotzige isch äs trocke. Hüt si 92 Jugendliche und 16 Leiter u Betreuer im Ysatz. U sehr viu Eutere u Fan's chöme üs cho ungerstütze, MERCI VIU MAU!
Ds Täschedepot über drei Tischlängine mache mir im Feschtzäut. Die erschti Gruppe-Yteilig u Yturne isch agseit. U mit grosser Spannig starte mir am haubi nüni i üse erscht Wettkampfteu mit Grätkombi, Teamaerobic, Zieuwurf u Kugustosse. Mit glückleche Auge chöme aui im Grätzäut zäme für die zwöiti Yteilig. Bereits wärde die erschte Idrück ustuschet - wie isch's euch gange, isch's guet gloffe. Am haubi zähni geits witer mit Gymnastik, Grätkombi Ungerstuefe u 4 Athlon. Super gö ou die Wettkämpf verbi. Am letschte Wettkampf no einisch aui Chräft sammle u ds beschte gä. So starte mir am viertu vor eufi i dritt Wettkampfteil, mit Pendustaffete, Medizinbaustosse u Sektoresprung.
Glücklech u mit guete Erinnerige chere mir zrüg is Feschtzäut. Bi schönschtem Wetter hei mir das güebte dörfe zeige u jetz isch für diu ä abchüelig im Pool agseit - angeri hei sech am Freizytwettkampf gwidmet. Das heisst Harassestige, Cheigle u Puzzle (2,60 x 2,60 Meter) mache.

Um 12.30 Uhr isch's Mittagesse ir 4. Abteilig. Ds Menu: Hackbrate u Härdöpfustock, ds Trinke nach Wau u zum Dessert ä Glace.
Ar Leitersitzig am 13.45 Uhr ha i ds witere Programm verno. Dr Michael, d'Romina u d' Luana hei früecher müesse cho für ä Imarsch a dr Rangverkündigung vom Einzuwettkampf vom Samschtig. Die ganzi Jugi Ins het sech uf em Raseplatz versammlet u die Turnerinne u Turner mit Applous begrüesst. Rangverkündigung Liechtathletik vom Samschtig: Goldmedallie, Michael Kramer, Silbermedallie, Romina Vogel u Luana Siegrist. U no 10 Goldkrüzli (z gseh uf dr Rangliste).

Aschliesend isch ds Seilizieh cho im Cup System. Das heisst einisch verliere u meh isch usgschiede. Da si nume die grosse Modis bis i Finau cho u dört hei si verlore. Äs si 145 Mannschafte gmäudet gsi u somit isch das Seilizieh zwe stund turet. Üser Modis, Giele u Beteuer hei sech Zyt vertribe mit äre grosse Wasserschlacht.
Ä witere Höhepunkt isch dr Ballonwettbewerb gsi. Über 1000 roti u wissi Ballön si mitenang i Himu gstige u mir hei se Begleitet mit emene risige Applaus.
Endlech endlech isch d'Rangverkündigung vom Vereinswettkampf (17.15Uhr). Gpannt hei mir die erschti Stärkiklass abgwartet. Dritt isch Lyss was si mir ä zwöi oder sogar erscht oder müesse mir ohni Medalie hei? Das hei sech aui gfragt. Dr Wenker Yves hets ganz spannend gmacht: Uf em zwöite Platz mit 26.07 Punkt u somit Gwinner vor Silbermedalie isch d'Jugi, ä grossi Spannig u ganz stiu lose aui, INS! Jeh, jupi, super, geil, geniau, isch grüeft worde, u umarmt u gratuliert isch worde. Ja mir hei üs gfröit aui füre dörfe go ä Medalie reicht.
Sehr Glücklich u mit viu Fröid si mir zum Feschtzäut zrüg. Dr David Stucki het no dr Finau vom Harassestige müesse bstritte u isch de zwöit worde. Ou im Puzzle si mir im Finau gsi. D'Gruppe mit em David Kappeler u sine 7 Fraue hei sech im Finau düregsetz u hei gwunne.
Nach em Gruppefoto hei mir üser Sache zämepackt u hei üs ufe Heiwäg gmacht.
Ds Ins hets no jedem äs Chrüzli gä u so isch dä läng Tag glücklich ds End gange.

Äs ganz grosses MERCI a aune Jugendliche für ire tolle Ysatz u iri super Leischtig! Äs isch schön mit Euch so äs Fescht mitdsmache.

MERCI ou aune Leiter, Betreuer, Fahrer, Eutere u Fan's, ohni öii grossartigi Hiuf chönte mir nid a so emene Grossalass teunäh.

U no äs GROSSES MERCI a üsne Kampfrichter, wöu ohni si chönte mir nid am Wettkampf starte. Für üs im Ysatz si gsi: Walter Graf, Marcel Gatschet, Sylvia Kramer, Sabine Keller, Barbara Lewis, Kathrin Hämmerli, Regula Möschler u Jörg Liechti.

Regula Hauert

 
Kopierrecht © 2003 bei Turnverein Ins, Schweiz
Alle Rechte vorbehalten.