Viva la Tippi!!!



Skiweekend in Thyon-Les Collons vom 12./13. Januar 2002
(von Marc Gatschet, 17.1.2002)
 

Am Samschti 12 Jänner isches wider mou sowit gsi, lüt chli u gross, vo nah u fern heisech bir Sporthalle Ins zum Ski-Weekend 2002 troffe. Äs het viu gä zum ilade, deu hei sogar zwöi Sportgrät mitgno (Snowboard u Carving-skis) dr Dänu isch aber mitem gmietete Bus beschtens vorbereitet gsi, är het jo schliesslech Erfahrig. Gli emou isches los gange uf die Reis richtig Wallis. Der Zwüschehaut isch sit letscht Johr ou scho Standart! Raststätte St. Bernhard churz vor Martigny. Do heissts: aui usschtige!! und sofort ad Wärmi. Eigendlech hätte mir do abgmacht mit de "Chriechewiler" aber wis haut eso isch nacheme Ungerhautigsobe z Wünnewil..... Nach telefonischer Abklärig i d'Region Loupe, simer de nacheme Kafi u Gipfeli wider igschtige u witergfahre.

Dr Sunneschin u die schöne Bärge heinis de scho gli in Empfang gno. Das Johr heimer wider im aut bekannte le Sporting Ungerkunft bercho. Nachem Zimmerbezug hets nümme angers gä, aus Schi u Snowboard aschnaue und ab uf Pischte.

Mhhh... sone Pizza zum z' Mittag isch haut immer öppis guets, hets de scho gli gheisse u ersch no miteme Blick zum Louberhornrenne wo im Fehrnseh glüffe isch. HOPP DIDIER u HOPP BRÜNU hetz döhnt, gnützt hets nüt.

Übrigens üsi "Chriechewiler" der Wale z Dorli u der Mischel si ungerdesse ou zu üs gschtose, wenn ou mit Verschpähtig, aber denoch guet glunt und topfit...

Mir hei di guete Verhäutnis vo Wätter u Pischte vou u ganz usgnützt, bis ja bis.. das cheibe Tipi-Zäut, mi gsehts haut vo gar wit!! aber z Apero het grüefft u de simer haut, wi au die Johre wider ine. Ungerdesse si z Kitty u der Kai vo de Schueustubene entloh worde, und ou zu üs gschtosse. Musig, Kaffi, Bier, usw. hets wider gä im Tipi!!

Dasmou sogar mit Aerobic vom Werni us de Bündnerbärge!! d Lüt hets packt, aui hei mitgmacht SUPER!!
Langsam aber sicher heimeris uf ä Wäg richtig le Sporting gmacht, guet acho?? guet abe cho?? hei si di gfrogt, wode bisch go d Schischue abzieh!! Wie ou immer, nachder wohltuende Duschi hetmesech de uf z Ässe gfröit.
Guet isches gsi! Braten u Gratin mit Gmües und zum Dessert äs Himmbeerchüechli. Äs isch de gjasset worde, u nacheme Schlummerdrünkli im Pup si di meischte de ou itz Bett gschlüffe.

Am nächschte Morge, nacheme wärschaffte Früehschtück simer de wider bi schöntschtem Wätter go Schine. Bsungers Bärepischte hets in sich gha, äs Schümeli Kunschtschnee u "griffig" das lässt Carver´s Herz höher schlagen!!

Z´Mittag heimer im "les Chottes" gässe. Wüus aber weni Schnee gha het, simer de schnäu wider richtig Thyon 2000 überegschinet.

Am spätere Nahmittag hets gheisse, Abschied näh u wider abe i Näbu. Der Dänu hetis souverän wider hei gschoffiert. Im Stärne z Ins heis de äs Paari no lo usklinge.

Z Wätter het mitgmacht, äs isch luschtig zu u här gange. Was weimer no meh?? Auf ein nächschtes Ski-Weekend im 2003. Merci a aui vo nah und fern.

Gatschet Marc

 

Kopierrecht © 2002 bei Turnverein Ins, Schweiz
Alle Rechte vorbehalten.